ஷங்கர் இயக்கத்தில், விக்ரம் நடித்த 'ஐ' படத்தின் டீஸர் 'யூடியூப்' பில் 50 லட்சம் பார்வையாளர்களைப் பெற்று சினிமா ரசிகர்களை திரும்பிப் பார்க்க வைத்தது.
முதன்முறையாக ஒரு தென்னிந்திய படத்தின் டீஸர் சாதனை படைத்தது என்றால் அது ஐ டீஸர்தான். அதோடு இந்திய அளவிலான டிரைலர் / டீஸர் 'யூடியூப்' பார்வையாளர்களின் 'டாப் 10' பட்டியலில் 7வது இடத்தைப் பிடித்திருக்கிறது 'ஐ'.
விரைவில் இந்த எண்ணிக்கை 1 கோடியைத் தொடும் என்று எதிர்பார்க்கப்படுகிறது.
திரைப்படங்களின் டீஸர்,டிரைலர்,மோஷன் போஸ்டர்'யூடியூப்'பில் வெளியிடப்படும்போது இதுவரை பார்வையாளர்களின் எண்ணிக்கை மட்டுமே சாதனையாகப் பார்க்கப்பட்டது. சமீபகாலமாக, அவை பெறும் 'லைக்'குகளையும் சாதனையாகப் பார்க்க ஆரம்பித்துள்ளனர்.
இந்திய அளவில் 50 ஆயிரம் 'லைக்'குகளை வெறும் 48 மணி நேரத்தில் பெற்று சாதித்திருக்கிறது அஜித்தின் 'என்னை அறிந்தால்' டீஸர் . இதற்கு முன்பு சல்மான் கானின் 'கிக்' டிரைலர் 72 மணி நேரத்திற்குள் இந்த சாதனையைச் செய்திருக்கிறது.
அதேபோல் ட்விட்டரில் 'டிரென்ட்' செய்யும் கலாச்சாரமும் தற்போது பிரபலமாகிவருகிறது. எந்த நடிகருடைய 'டேக்' எத்தனை நாட்கள் டிரென்டில் இருக்கிறது, அதன் மூலம் எத்தனை லட்சம் 'ட்வீட்'கள் செய்யப்படுகின்றன என்பதும் இப்போது சாதனையாகப் பார்க்கப்படுகிறது.
அந்த வகையில் தென்னிந்தியாவிலேயே அஜித் ரசிகர்கள் தொடர்ந்து 4 நாட்களாக #YennaiArindhaalTeaserStormOnDec4 என்ற ஹேஷ்டேக்கை தொடர்ந்து இந்திய டிரென்டில் வைத்திருக்கிறார்கள். அதோடு இந்த டேக்கைப் பயன்படுத்தி இதுவரை 4 லட்சத்திற்கும் மேற்பட்ட ட்வீட்களும் செய்யப்பட்டுள்ளதாம்.
தென்னிந்திய படங்களைப் பொறுத்தவரை இந்த நிமிடம் இதுதான் அதிகபட்ச சாதனையாக உள்ளது. நடிகர்களிலேயே ஆசி பெற்ற நடிகர் அஜித். அவருடைய ரசிகர்கள் அஜித்தை கொண்டாடுவதுபோல் வேறு எந்த நடிகரின் ரசிகர்களும் தங்களின் நட்சத்திரத்தை கொண்டாடுவதில்லை.
