எந்திரன் படத்திற்குப் பிறகு சுமார் 4 வருடங்கள் கழித்து(ரியல் ரஜினியாக, கோச்சடையான் அனிமேஷன்) மீண்டும் தங்கள் தலைவனை திரையில் பார்க்கும் சந்தோஷத்தில் இருக்கிறார்கள் ரஜினி ரசிகர்கள்.
லிங்கா படத்தை ரஜினியின் பிறந்தநாளான 12.12.2014 அன்று வெளியிடுவது என்று ஏற்கனவே முடிவு செய்யப்பட்டுவிட்டாலும், லிங்கா கதை தொடர்பாக கோர்ட்டில் தொடரப்பட்ட வழக்குகள் காரணமாக முன்பதிவை தொடங்குவதில் தயக்கம் இருந்தது.
வழக்குகளினால் ஏற்பட்ட பிரச்சனைகள் அமுங்கிப்போக, ஒருவழியாக முன்பதிவை தொடங்கினார்கள். லிங்கா படத்திற்கான முன்பதிவுகள் நேற்று அதிகாலையிலேயே துவங்கியது. காலையில் எழுந்து முதல் வேலையாக லிங்கா டிக்கெட்டை முன்பதிவு செய்ய ஆன்லைனுக்குச் சென்ற ரசிகர்கள் பலரும் அதிர்ச்சியடைந்தனர்.
காரணம்...பெரும்பாலான தியேட்டர்களில் லிங்கா படத்திற்கான முதல் மூன்று நாட்களுக்கான அனைத்து காட்சிகளுக்கான டிக்கெட்டுகளும் விற்றுத்தீர்ந்துபோய்விட்டன.
குறிப்பாக சென்னையில் - ராயப்பேட்டை, வேளச்சேரி, பெரம்பூர், திருவான்மியூரில் உள்ள, சத்யம் சினிமாஸின் தியேட்டர்களில் ஹவுஸ்ஃபுல். மற்ற காம்ப்ளக்ஸ் தியேட்டர்களிலும் ஹவுஸ்ஃபுல். எனவே லிங்கா படத்தை முதல் மூன்று நாட்களில் பார்க்க முடியாதநிலை ஏற்பட்டதும், பலருக்கும் அதிர்ச்சி. இப்படி ஏமாந்த ரசிகர்களை சாமர்த்தியாமாக கே(ஷ்)ட்ச் பண்ணிவிட்டனர் ரஜினி ரசிகர்கள்.
சென்னையில் உள்ள முக்கிய தியேட்டர்களில் நள்ளிரவு காட்சி அதிகாலை காட்சிக்கு தியேட்டர்களை புக் பண்ணி சிறப்பு காட்சிக்கு ஏற்பாடு செய்துவிட்டனர்.
இந்த தகவலை போஸ்டர்கள், எஸ்எம்எஸ், வாட்ஸ்அப், ட்விட்டர், பேஸ்புக் மூலம் விளம்பரம் செய்துவிட்டனர். இந்த சிறப்பு காட்சிக்கு ஒரு டிக்கெட்டின் விலை எவ்வளவு தெரியுமா? 600 ரூபாய் தொடங்கி, 1000 ரூபாய் வரை விற்கப்படுகிறது.
