தீபாவளிக்கு இன்னும் பதினைந்து நாட்களே உள்ள நிலையில் தீபாவளி தினத்தன்று வரும் படங்களைப் பற்றிய எதிர்பார்ப்பு அதிகமாகிக் கொண்டே போகிறது.
'தூங்காவனம், வேதாளம்' ஆகிய இரண்டு படங்கள் மட்டுமே தீபாவளிக்கு வர உள்ளதால் இந்த இரண்டு படங்களுக்கிடையேதான் போட்டி நிலவும். அதிலும் 'வேதாளம்' படம் அஜித் ரசிகர்களால் அதிகமாகவே கொண்டாடப்பட்டுவிடும்.
'வேதாளம்' தீபாவளிக்கு நான்கு நாட்களுக்கு முன்னதாக வந்தாலும் ஆச்சரியப்படுவதற்கில்லை என்றுதான் கோலிவுட்டில் ஒரு தகவல் உலா வருகிறது. 'தூங்காவனம்' படம் தீபாவளியன்றுதான் திரைக்கு வர உள்ளது, அதில் எந்த மாற்றமும் இருக்காது என்றே சொல்கிறார்கள்.
இதனிடையே 'வேதாளம்' படத்தின் டிரைலரை அஜித் ரசிகர்கள் மிகவும் ஆவலுடன் எதிர்பார்த்து காத்துக் கொண்டிருக்கிறார்கள். அனேகமாக இன்னும் சில தினங்களில் 'வேதாளம்' டிரைலர் வெளியாகும் என்று தெரிகிறது.
'வேதாளம்' டீசர் இரண்டு வாரங்களுக்கு முன் வெளியிடப்பட்டது. இந்த இரண்டு வாரத்திலேயே இந்த டீசர் மிகப் பெரும் வரவேற்பைப் பெற்றுள்ளது. விரைவில் இந்த டீசர் யு டியூபில் 5 மில்லியன் பார்வையாளர் கணக்கைத் தொட இருக்கிறது. இன்னும் 50000 பேர் பார்வையிட்டால் அந்த சாதனையை 'வேதாளம்' டீசர் நிகழ்த்திவிடும்.
'வேதாளம்' டிரைலர் வெளிவந்தால் அது டீசரின் சாதனையையும் முறியடிக்க வாய்ப்புள்ளது.
